Тарих пәнінің мұғалімі Ж.Құлманов жолдаудағы білім саласына қатысты мәселелерге тоқталды. Бағдарламалық құжатта ел экономикасын дамыту, заманға сай өркендеу сынды тың мәселелер қозғалды. Халықтың әлеуметтік жағдайын жақсартуға бағытталған Жолдау әр саланы қамтып, жүйелі жұмыс істеуге негізделген. Мемлекет басшысы бұл Жолдауында еліміздің білім саласы үшін түбегейлі бетбұрыс кезеңінің басталғанын нақты айтты. Мұғалімдердің кәсіби мерекесі қарсаңында ұстаз мәртебесін айқындау туралы Елбасының тапсырмасы атаулы сыйлық болды деп есептеймін. «Келесі жылы «Педагог мәртебесі туралы» заң әзірлеп, қабылдау қажет деп санаймын. Бұл құжат мұғалімдер мен мектепке дейінгі мекемелер қызметкерлері үшін барлық игілікті қарастырып, жүктемені азайтуға, жөнсіз тексерістер мен міндеттен тыс функциялардан арашалауға тиіс» деді Президент өз Жолдауында. Ұстаздардың мәртебесін айқындайтын заң мұғалімдерді және мектепке дейінгі мекемелердің қызметкерлерін ынталандырудың барлық тетіктерін қарастырады. Ұстаздардың жүктемесі қысқартылып, түрлі тексерістерден арылатын болады. Сонымен қатар Елбасы Назарбаев зияткерлік мектептерінің білім беру әдістемесі мемлекеттік мектептер үшін бірыңғай стандартқа айналуы тиіс екендігін айтты. Бюджеттік сала өкілдері жалақысының 35%-ке өсетіні, білім саласындағы реформалардың сапасына мән берілетіні ұстаздар қауымын қуантты. Тиісінше мұғалімдер құлшынып жұмыс істейтін болады. Біздің елімізде білімге болашаққа құйылған инвестиция ретінде қарап, мектеп оқушыларына жан-жақты әрі заманына сай лайықты білім беру үшін барлық жағдай жасалған. Кейінгі жылдары баланы практикалық біліммен ғана сусындатпай, әлеуметтендіруге де үлкен мән берілуде. Сондай-ақ үштілді білім беру, роботтехника сыныптарының ашылуы – осының айғағы... Алайда, баланың ана тілі, дүние есігін ашқаннан бесік жырын естіп өскен қазақ тілі ең басты орында екенін ұмытпауымыз керек. Жиналыс арасында география пәні мұғалімі К.С.Жунусова өз пікірін білдіріп, жолдауды қолдайтынын айтты.